Мастацкі праект Ірыны Котавай “Уяўны Парыж” ў галерэі БДАМ 29 avril, 2011

Classé dans : Evénements — julienovik @ 14:40

Вясёлкавы мост Мiнск – Парыж

З 5 па 13 мая галерэя Беларускай дзяржаўнай акадэміі мастацтваў прапануе Вашай увазе унікальную ў сваім родзе выставу выпускніцы кафедры графікі 2002 г. Ірыны Котавай, якая свой першы перыяд самастойнай творчасці прысвяціла навуковым даследаванням і мастацкім пошукам пад высокім небам Парыжа. Плён яе вобразных адкрыццяў сканцэнтраваны ў выдатнай серыі пейзажных кампазіцый, створаных у тэхніцы пастэлі, якія дазваляюць гледачу перажыць незабыўнае ўражанне ад розных парыжскіх матываў: набярэжная Сены, Манмартр, Люксембургскі сад, парк Бют-Шамон, і што вельмі фенаменальна, панарама цэнтра Парыжа, упершыню ў гісторыі еўрапейскага гарадскога пейзажа перададзеная мастацкімі сродкамі выразнасці з высокіх дахаў Міністэрства замежных справаў Францыі і іншых знакавых будынкаў французскай сталіцы.          

Апрача чыста пейзажных матываў мастачка стварае кампазіцыі, навеяныя яе даследаваннямі ў галіне гісторыі візантыйскага мастацтва, а таксама адухоўленыя вобразамі сучаснікаў, якія жывуць і актыўна развіваюцца як асобы  ў агромністым еўрапейскім мегаполісе.            

          Праект « Уяўны Парыж » ажыццёўлены пры падтрымцы і ўдзеле Міністэрства культуры Рэспубліцы Беларусь, Пасольства Рэспубліцы Беларусь у Францыі і Пасольства Францыі ў Беларусі, а таксама Беларускага саюза мастакоў. Упершыню парыжская серыя твораў Ірыны Котавай была прадстаўлена ў снежні 2010 г. – студзені 2011 г. у Нацыянальным мастацкім музеі Рэспубліцы Беларусь.

            Прапанаваная экспазіцыя – першы наватарскі зварот І.Котавай да спасціжэння вялікай мастацкай спадчыны і яе сучаснага ўваскрашэння на ўзроўні высокага творчага палёта над дахамі Парыжа. Гэту выставу таксама можна вобразна параўнаць з паветраным вясёлкавым мастом, які сімвалізуе творчы працяг неабмежаваных і плённых беларуска-французскіх сувязей.

 У праграме вернісажа, пры падтрымцы і ўдзеле Пасла Францыі ў Рэспубліцы Беларусь спадара Мішэля Рэнэры, адбудзецца паказ фільма « Уяўны Парыж » (Беларусь, 2010, рэж. С. Кацьер) і прэзентацыя аднайменнага альбома.

 Куратар выставы, кандыдат мастацтвазнаўства, дацэнт БДАМ  Я.Шунейка.     

           Неабходна адзначыць лаканічны артыстызм выяўленчай мовы Ірыны Котавай. Яна не займаецца дакументальнай канстатацыяй таго ці іншага ўбачанага ёй матыва, а перадае яго выразную вобразную адметнасць, шматасацыятыўнасць. У гэтым сэнсе яе творы ўспрымаюцца як жывы працяг выдатных традыцый дэмакратычнага французскага мастацтва ХІХ – першай паловы ХХ ст., звязаных з незабыўнай творчасцю імпрэсіяністаў, постімпрэсіяністаў, сімвалістаў, экспрэсіяністаў, сярод якіх – К. Мане,К.Пісаро, В.Ван Гог, П.Банар, А.Марке, М.Утрыла, М.Шагал, Х.Суцін, С.Кікоін і інш.  Як бачым, наяўнасць у гэтай творчай грамадзе і нашых славутых землякоў не можа не натхняць маладую таленавітую мастачку не толькі на развіццё традыцый парыжскіх краявідаў, але і на адкрыццё свайго вобразнага свету, які яна называе “Уяўным Парыжам”, што нараджаецца пад яе рукой пад уздзеяннем  рэальна існуючай і агульна прызнанай сталіцай сусветнага  мастацтва.        

           Яе жывыя і выразныя творы, выкананыя на адным дыханні, ужо знайшлі шырокае прызнанне сярод парыжскіх знаўцаў і калекцыянераў сучаснага мастацтва. Асаблівая творчая сувязь лучыць І.Котаву з парыжскім пісьменнікам-эсэістам  К.Левалуа, які на падставе яе вобразных кампазіцый, стварае рамантычныя літаратурныя замалёўкі.